Aguesta setmana, eth Conselh Generau d’Aran a acuelhut era prumèra session deth Living Lab deth projècte CIMER ena Val d’Aran, ua jornada basada ena innovacion sociau, era inclusion de persones damb fragilitats en entorns ruraus e de montanha. Er acte a compdat damb era benvenguda institucionau dera sindica d’Aran, Maria Vergés, qu’a remercat era importància de projèctes collaboratius entara coesion sociau e territoriau.
Aqueste Living Lab a estat organizat peth sòci deth projècte CIMER, era Fundació Ilersis, qu’acompanhe accions d’inclusion e supòrt entara vida independenta enes sectors sociau e educatiu. Era session amassaue entitats locaus, professionaus deth sector sociau, educadors e ciutadania, damb er objectiu de detectar besonhs reaus e cocrear propòstes concrètes entà ua Val d’Aran mès inclusiva.
Sus eth projècte CIMER
CIMER (Comunitats Inclusives de Montanha en Espaci Rurau) ei ua iniciativa transfronterèra, cofinançada peth Hons Europèu de Desvolopament Regionau (FEDER) a trauès deth programa POCTEFA 2021–2027, que trabalhe entà impulsar era inclusion sociau e era vida independenta enes zònes ruraus e de montanha des Pirenèus.
Eth projècte se desplegue a trauès dera dinamizacion de Living Labs locaus —espaci participatius de cocreacion— e d’autes accions com era creacion dera Escòla de Vida Independenta, era pròva pilòt de tecnologia d’assisténcia en abitatges, era mentoria comunitària, e era metuda en foncionament d’un centre mobil d’atencion familiau.
Damb accions de cap a cap deth Pirenèu, CIMER vò bastir un hilat de territòris transfronterèrs que promòiguen era igualtat d’oportunitats, era participacion activa e era inclusion des persones mès vulnerables.
